रुणझुण वाजंत्री वाजती
म्होरं कलावंती नाचती

नवरा आला वेशीपाशी
नवर्‍या नवरी कशी नेशी

देईन येसकर्‍याचा मान
नवरी जिंकून नेईन

नवरा आला देवळापाशी
नवर्‍या नवरी कशी नेशी

विडा देवाजी देईन
नवरी जिंकून नेईन

नवरा आला मांडवापाशी
नवर्‍या नवरी कशी नेशी

मांडव खंडणी देईन
नवरी जिंकून नेईन

नवरा आला भोवल्यापाशी
नवर्‍या नवरी कशी नेशी

खण करवलीला देईन
नवरी जिंकून नेईन

तिळातांदळा भरली मोट
ज्याची होती त्याने नेली
वेडी माया वाया गेली

रुणझुण वाजंत्री वाजती
म्होरं कलावंती नाचती