चित्रपटातील प्रसंग असा आहे- कथेतील हे पात्र नाटकात काम करते आहे. त्यातील गाण्याचा सराव घरी चालू आहे. म्हणजे गाणं चित्रपटातलं असलं तरी जायला नाट्यगीताच्या वळणाने हवं.. तरी ते नाटकात गायल्यासारखं अभिनीत न होता, चित्रपटातील प्रसंगानुसार, पत्ते खेळता खेळता सादर व्हायला हवं. अरुण सरनाईक यांच्यासारखा कसदार, संयत अभिनेताच हे आव्हान पेलू शकतो. ते स्वत: उत्तम गायक होते. त्यांचे वडील, शंकरराव सरनाईक हे संगीतकार होते. त्यांच्या घरात संगीताचं वातावरण होतं. त्यामुळे त्यांचा येथील अभिनय अधिक सशक्त झाला आहे.

अगदी असंच हिंदीतील अभिनेत्री नूतन यांच्याविषयी बोललं जातं. 'मोरा गोरा अंग लै ले', 'मनमोहना, बड़े झूठे', 'काली घटा छाये मोरा जिया तरसाये' ही गाणी, आशाताईंच्या गाण्यासाठी ऐकावीत तशीच नूतनजींच्या गातानाच्या अभिनयासाठी पहावीत, असं म्हणतात. नूतनजीही उत्तम गायच्या.

'सांग सख्या तुज काय हवे' हे त्यांनी गायलेले मराठी गाणे आहे. १९७७ सालच्या 'पारध' या चित्रपटातील. हा चित्रपट त्यांच्या कारकिर्दीच्या उत्तरार्धातला. या काळातील त्यांच्या अभिनयाची पडझड लक्षात घेतली तरी नूतनजींनी गायलेले मराठी गाणं म्हणून याचे वैशिष्ट्य नक्कीच राहील.

  अलका विभास

* 'आठवणीतली गाणी'वर प्रसिद्ध झालेले ब्लॉग्ज कॉपी-पेस्ट करणे अनधिकृत आणि अनैतिक आहे. या लिखाणाचा कुठल्याही प्रकारे वापर करण्याआधी लेखकाची परवानगी घेणे बंधनकारक आहे.
* ही लेखकाची वैयक्तिक मते आहेत. या लेखात व्यक्त झालेली मते व मजकूर यांच्याशी 'आठवणीतली गाणी' सहमत किंवा असहमत असेलच, असे नाही.