मी वार्‍याच्या वेगाने आले
तुझ्या प्रीतीने धुंद झाले
वसंतातले रंग ल्याले
अशा रेशमी सांजवेळी
तुझे गीत झंकारताना सूर प्‍याले

बेहोष वेळी अशा गाण्यात आली नशा
आनंद ओसंडताना बेधुंद झाल्या दिशा
कुठे पान नादात हाले तसे फूल लाजून बोले
तुझी पाकळी मीच झाले

आभाळ गंधाळताना, दो जीव स्वप्‍नाळताना
श्वासांतही कैफ आला हे चांदणे सांडताना
तुझा स्पर्श होताच गाली, मनी मल्मली हालचाली
क्षणी चंद्र गंधात न्हाले