ही कुणी छेडिली तार
प्राजक्ताच्या मधुगंधासम कुठुनी ये केदार?

तूच छेड ती, तूच ऐक ती
आर्त सुरावट तुझ्याच हाती
स्पर्शावाचून तूच छेडिसी माझी हृदय-सतार !

जागृत मी का आहे स्वप्‍नी?
श्रवणी पडे पण दिसे न नयनी
स्वप्‍नातच का मजसी बोलले माझे राजकुमार?

स्वप्‍नासम मज झाले जीवन
स्वप्‍नही नीरस सखी तुझ्यावीण
अर्ध्या रात्री शोधीत आलो तुझे प्रियतमे दार !

वेलीवर त्या नका चढू नका
चढा सूर नच लवे गायका
तूच चढविला तारस्वर हा, तूच तोड ही तार !