ऊठ विठ्ठला उठी गोपाला, उठले चराचरू
प्राचीवरती प्रकाश फुलला, उठला बघ दिनकरू

विहंग उठले उठल्या धेनू, गोर्‍हे-कालवडी
मार्ग लक्षिती तव शिखराचा पुण्यवंत कापडी
किर्तनरंगी आळविती तुज नारदमुनी-तुंबरु

जागे झाले पुंडलिकाचे मायतात सज्‍जन
प्रभातकाळी तुज भक्तांचे घडण्या मुखदर्शन
कुणी काकडा घेऊन आले आरतीस सत्वरू

फूल उमलते जसे कळीतून उघडी नयनदले
तेजोमय दीपातून जैसे तिमिरी तेज फुले
संतजनांचा आनंदाचा परिसावा गजरू