A Non-Profit Non-Commercial Public Service Initiative by Alka Vibhas   
सूर हरवला होता

सूर हरवला होता माझा ऊर हरवला होता
राधा उरली नव्हती राधा, श्याम हरवला होता

वृंद फुलांचा डुलला होता
भृंग त्यावरी भुलला होता
हेमंत न मज कळला जोवर, वसंत फुलला होता

गीत गायिले तेच ओठ हे
सुधा प्राशिली तेच पात्र हे
आले नाही तरीही गाणे, तो तर गेला होता

जवळी माझ्या होते सारे
श्वासापुरते नव्हते वारे
रथात बसले तरि, अनवाणी पथ हा झाला होता

तोच अचानक वाजे पावा
धावे राधा, मिटे दुरावा
आसमंत हा अवघा आता श्यामच झाला होता