दरबार जुना ह्यो, हंड्या-झुंबर नवं
मध्यान्ह रातीला आता लावा अत्तर-दिवं
अंगअंगी मी रंग खेळते, केसांमधी मरवा
पिकल्या पानाचा देठ की हो हिरवा !

नख लागंल बेतानं खुडा
केशरी चुना अन्‌ कात केवडा
लई दिसानं रंगल्‌ विडा
व्हटाची लाली टिपुनी घ्याया
मुखडा असा फिरवा
पिकल्या पानाचा देठ की हो हिरवा !

थोडी झुकून थोडी वाकते
पडला पदर, लाज झाकते
नेम धरून बाण फेकते
तुमचीमाझी हौस इश्काची
हळूहळू पुरवा
पिकल्या पानाचा देठ की हो हिरवा !