धीरे जरा गाडीवाना रात निळी काजळी
मुलुख त्यात मावळी !

वाट चुके लवणाशी, वळणाचा पेच पडे
डोंगराच्या डगरींना घाटाचा माठ जडे
दोही बाजू दाट कुठे आंबराई जांभळी
मुलुख त्यात मावळी !

घुंगुराच्या तालावर सैल सुटे कासरा
खडकाशी चाक थटे बैल बुजे बावरा
पेंगुळता हादरती गाडीमंदी मंडळी
मुलुख त्यात मावळी !

करवंदी जाळीमंदी ओरडती रातकिडे
निवडंगी नागफणी आडविता चाल अडे
ठोकरली येथ गड्या बादशाही आंधळी
मुलुख त्यात मावळी !