जिवलगा थांब, मोगरा फुलेतों थांब

उद्यां पाकळ्या सार्‍या फुलतिल
साद जिवाला सुगंध घालिल
डोळे उघडुनि अंगण पाहिल
मधुमास हंसेतों थांब, मोगरा फुलेतों थांब

पानांआडुनि गाई कोकिळा
तप्त नभाचा उर गंहिवरला
माझ्याहि उरिं कांटा फुलला
कोकिळा गाइंतो थांब, मोगरा फुलेतों थांब

मध्यरात्रिचें मदिर चांदणे
स्पर्शुनी करितें जादूटोणे
जीव घाबरे हा स्वप्‍नानें
चंद्रमा बुडेतों थांब, मोगरा फुलेतों थांब

प्रवास अवघड, पंथ दूरचा
अरुण उद्यांचा लोळ अग्‍नीचा
क्षण कुसुमित कर विश्रांतीचा
ये घाम पुसेतों थांब, मोगरा फुलेतों थांब