मागता न जेथे मिळते
बोलता न सारे कळते
त्या नगरीची राणी सखया
प्रीत तुझी रे करिते किमया

सौंदर्याला रूप न जेथे
सुगंध मोहक फूल न दिसते
चंद्राविण त्या चांदराती
वसंत नसता कोकिळ गाती
वृक्षाविण रे जेथे छाया
प्रीत तुझी रे करिते किमया

मंदिर आहे; मूर्ती न दिसते
भक्ताविण ती भक्ती वसते
तिलोत्तमेची माया तेथे
मछिंद्र सारे जिंकुन नेते
मायावतीला त्या जाऊया
प्रीत तुझी रे करिते किमया