काठी न्‌ घोंगडी घेऊन द्या की रं
मला बी जत्रंला येऊन द्या की

दिसं आलाय माथ्यावर, बघ दुपार झाली भर
त्या गोटमाळावर कुणबी सोडुनी नांगर
टाकी वैरण बैला म्होरं, घेतो विसावा घटकाभर
त्याची अस्तुरी सुंदर, आली घेउनी भाकर
पाय भाजत्याती चरचर अन्‌ कशी चालतीया झरझर
कांदा न्‌ भाकरी खाऊन द्या की रं
मला बी जत्रंला येऊन द्या की

पळपळून म्या चौखुर, वळती करून आणल्यात गुरं
हणम्या बैल हाय ह्यो माजूर, देतो झुकांडी जातो दूर
गाय कपिली लई चातूर, दूधदूध पियाला भरपूर
गुरं पाण्यावर नेऊन द्या की रं
मला बी जत्रंला येऊन द्या की

मी लोकाचा हाय चाकूर, जीव जमून होतोय चूर
धनी माझा लय्‌ मगरूर, मालकीण करी कुरकूर
पायामंदी नाही खेटूर, चिंधी फाटतीया टुरटूर
अरं दुपार टळून जाऊन द्या की रं
मला बी जत्रंला येऊन द्या की

सदू सोनाराचा शिरीधर, मधु बामनाचा मुरलीधर
चोखू चांभाराचा चंदर, वरल्या आळीचा जालंधर
घराशेजारी आपली घरं, बाळपणातलं मैतर
अरं तुमच्यात सामील होऊन द्या की रं
मला बी जत्रंला येऊन द्या की