करी दिवसाची रात, माझी सोडी ना वाट
याच्या डोक्यात अक्कल पिकवा
कुणी माझ्या रायाला शानपन शिकवा !

आडवाटेनं हेरतो मला
तर्‍हेतर्‍हेची करतो कला
कुणी रायाचा रस्ता चुकवा
माझ्या रायाला शानपन शिकवा !

किती किती सवाल याचं घेऊ?
किती किती जवाब मी देऊ?
बोल बोलून आला थकवा
माझ्या रायाला शानपन शिकवा !

नाही इचार मनात दुसरा
याच्या गाडीला लागलाय घसरा
लाल कंदील याला कुणी दाखवा
माझ्या रायाला शानपन शिकवा !