A Non-Profit Non-Commercial Public Service Initiative by Alka Vibhas   
जीवनात ही घडी अशीच

जीवनात ही घडी अशीच राहु दे
प्रीतीच्या फुलावरी वसंत नाचु दे

रंगविले मी मनात चित्र देखणे
आवडले वेडीला स्वप्‍न खेळणे
स्वप्‍नातील चांदवा जिवास लाभु दे

हळूच तुला बघण्याचा छंद आगळा
लज्जेचा त्याविण का अर्थ वेगळा
स्पर्शातून अंग अंग धुंद होउ दे

पाहू दे असेच तुला नित्य हासता
जाऊ दे असाच काळ शब्द झेलता
मीलनात प्रेमगीत धन्य होउ दे