राम राम घ्या, दूर करा जी भवतीचा घोळका
दिलवरा, दिल माझे ओळखा !

बांधला बादली साफा जरी मी वरून
रुळतात केस हे कुरळे भाळावरून
बघताच तुम्हाला डोळे आले भरून
नसत्या पदराकडे धावतो हात गडे सारखा
दिलवरा दिल माझे ओळखा !

ही पैरण मेली चोळीहुन काचली
हलचाल कटीची शेल्याने जाचली
पाऊले महाली कशीबशी पोचली
सोंग घेतल्या कधी चांदणे बनेल हो जाळ का?
दिलवरा दिल माझे ओळखा !

तुजसाठी दौड मी केली घोड्यावरून
मर्दानी वेष हा दुनियेसाठी करून
चोरून निघाले रात्री माझ्या घरून
एकान्‍ती मज घेई जवळी, सख्या असा वेळ का?
दिलवरा दिल माझे ओळखा !