ध्वज अशरण हा
ध्वज अमरण हा
ध्वज अविरत हा फडकेल !

वीरांच्या रुधिरांत भिजे हा
संतांच्या श्रद्धेंत रुजे हा
त्रिवर्ण हा निर्भय नीलांतुन
जीवन नव बरसेल !
ध्वज अविरत हा फडकेल !

दुर्बल-दलितांचें हा रक्षण
मिरविल समतेचें राणेंपण
अमानवांचें अंध महाबल
यावरती तडकेल
ध्वज अविरत हा फडकेल !

नक्षत्रांच्या दिव्य पथांतुन
इंद्रधनुष्यांच्या वेशीतुन
निळे चक्र हे जाईल, तेथे
जगत नवे उमलेल
ध्वज अविरत हा फडकेल !