देशाला स्वातंत्र्य मिळालं आणि 'स्वातंत्र्यसूर्य उगवला' हा पोवाडा त्यांनी लिहिला. संयुक्त महाराष्ट्राचा प्रश्न उभा राहिला तेव्हा बापट गरजले, 'ही मराठी भूमी धन्य, अशी नाही अन्य, वाढवी आम्हां काळी आई.' भारतावर चीनचं आक्रमण झालं आणि लगेच तुम्हां-आम्हांला चेतना देणारं 'उत्तुंग आमची उत्तर सीमा इंच इंच लढवू' हे गीत त्यांनी सहजपणे रचलं. काश्मीरचा हुतात्मा मकबुल शेरवाणी याला ते 'काश्मीर शोभतो मुकुट हिंदमातेचा, मुकुटांत झळकतो हिरा पृथ्विमोलाचा' या यथार्थ शब्दांत श्रद्धांजली वाहतात.

प्रा. मधू दंडवते रेल्वेमंत्री असताना कोकण रेल्वेचा एक टप्पा सुरू झाला तेव्हा बापट यांची काव्यमय प्रतिक्रिया झाली ती अशी:
लाल बत्ती हिरवी झाली, आली कोंकणगाडी
दादा आली कोंकणगाडी
ठाणे-मुंब्रा-कल्याणाची ओलांडून खाडी
दादा आली कोंकणगाडी

आपट्याला रेल्वेच्या शुभारंभाचा कार्यक्रम झाला तेव्हा बापटांसह आम्ही हे समूहगीत म्हटलं. त्या वेळी महाराष्ट्राचे मुख्यमंत्री वसंतदादा पाटील अध्यक्षस्थानी होते. म्हणून बापटांनीं चपखलपणे, 'दादा, आली कोंकणगाडी' अशी टाळ्यांच्या गजरांत भर घातली.
(संपादित)

सदानंद वर्दे
'अनामिकाचे अभंग आणि इतर कविता' या वसंत बापटकृत कवितासंग्रहाच्या प्रस्तावनेतून.
सौजन्य- मौज प्रकाशन गृह, मुंबई.

* ही लेखकाची वैयक्तिक मते आहेत. या लेखात व्यक्त झालेली मते व मजकूर यांच्याशी 'आठवणीतली गाणी' सहमत किंवा असहमत असेलच, असे नाही.

  इतर संदर्भ लेख