आज माझ्या अक्षरांना वचन दे रसिका तुझे
या स्वरांच्या चांदण्याला गगन दे रसिका तुझे

अक्षरांच्या लोचनांतुन गगन जरि हे निथळले
मी तुझ्यासाठीच केवळ बहर माझे उधळले
कल्पनावेलीस माझ्या सुमन दे रसिका तुझे

मी जगाचे ओठ झालो, बोलतो आहे खरे
दु:खितांचे दु:ख माझ्या अक्षरांतुन पाझरे
आसवें बघण्या व्यथांची नयन दे रसिका तुझे

काळजामाजि फुलांच्या भावना ओथंबल्या
एवढ्यासाठीच रात्री तारकां खोळंबल्या
आज कवितेच्या उषेला किरण दे रसिका तुझे